Business

ಸರ್ವಿಸ್‌ ಚಾರ್ಜ್‌ ನಿಯಮದ ವಿರುದ್ಧ ಕಾನೂನು ಸಮರಕ್ಕೆ ಮುಂದಾದ ಹೋಟೆಲ್‌, ರೆಸ್ಟೋರೆಂಟ್‌ ಮಾಲೀಕರು

ಹೊಸದಿಲ್ಲಿ: ಹೋಟೆಲ್‌ ಮತ್ತು ರೆಸ್ಟೋರೆಂಟ್‌ಗಳು ಆಹಾರ ಬಿಲ್‌ಗಳಲ್ಲಿ ಸೇವಾ ಶುಲ್ಕ (ಸರ್ವಿಸ್‌ ಚಾರ್ಜ್‌) ಸೇರಿಸಬಾರದು ಎನ್ನುವ ಸರಕಾರದ ನಿಯಮವನ್ನು ನ್ಯಾಷನಲ್‌ ರೆಸ್ಟೋರೆಂಟ್‌ ಸಂಸ್ಥೆಯು (ಎನ್‌ಆರ್‌ಎಐ) ಪ್ರಶ್ನಿಸಿದೆ. “ಅನಗತ್ಯ ಗೊಂದಲ ಸೃಷ್ಟಿಸಿರುವ ಈ ನಿರ್ಧಾರಕ್ಕೆ ಕಾನೂನಿನ ನೆಲೆಯಿಲ್ಲ,” ಎಂದಿರುವ ಎನ್‌ಆರ್‌ಎಐ, ಕಾನೂನು ಸಮರಕ್ಕೆ ಮುಂದಾಗಿದೆ.

ಸರ್ವಿಸ್‌ ಚಾರ್ಜ್‌ ಅನ್ನುವುದು ಸೇವೆ ಅಥವಾ ಉತ್ಪನ್ನದ ಒಟ್ಟು ಬೆಲೆಯ ಒಂದು ಭಾಗವಾಗಿರುತ್ತದೆ. ಸರ್ವಿಸ್‌ ಚಾರ್ಜ್‌ಗೆ ಜಾಗತಿಕ ಮಟ್ಟದಲ್ಲೂ ಮನ್ನಣೆಯಿದೆ. ಈಗ ಅನಗತ್ಯ ಮಾರ್ಗಸೂಚಿಯ ಮೂಲಕ ಸರಕಾರವು ಗೊಂದಲ ಸೃಷ್ಟಿಸಿದೆ. ಈ ಮಾರ್ಗಸೂಚಿಯ ಕಾನೂನು ನೆಲೆಗಟ್ಟನ್ನು ನಾವು ಪ್ರಶ್ನಿಸುತ್ತೇವೆ. ಒಂದು ವ್ಯವಸ್ಥೆಯ ಬದಲಾವಣೆ ಅಗತ್ಯವಾದರೆ ಹೊಸ ಕಾನೂನು ರೂಪಿಸಬೇಕು ಅಥವಾ ಇರುವ ಕಾನೂನಿಗೆ ತಿದ್ದುಪಡಿ ಮಾಡಬೇಕು. ಇದರ ಹೊರತಾಗಿ ಮಾರ್ಗಸೂಚಿಯನ್ನು ಹೊರಡಿಸಿರುವುದು ಸರಿಯಲ್ಲ,” ಎಂದು ನ್ಯಾಷನಲ್‌ ರೆಸ್ಟೋರೆಂಟ್‌ ಸಂಸ್ಥೆ ಅಭಿಪ್ರಾಯಪಟ್ಟಿದೆ.

ಈಗಾಗಲೇ ಇಂಥ ಸೇವಾ ಶುಲ್ಕಗಳು ಸರಕಾರ ಮತ್ತು ಖಾಸಗಿ ವಲಯದಲ್ಲೂ ಇವೆ. ಆದರೆ, ಸರ್ವಿಸ್‌ ಚಾರ್ಜ್‌ ಅನ್ನು ಕೇವಲ ಹೋಟೆಲ್‌ ಮತ್ತು ರೆಸ್ಟೋರೆಂಟ್‌ಗೆ ಸೀಮಿತಗೊಳಿಸಿರುವುದು ನ್ಯಾಯಸಮ್ಮತವಲ್ಲ,” ಎಂದು ಎನ್‌ಆರ್‌ಎಐ ದೂರಿದೆ.

ಕೇಂದ್ರೀಯ ಗ್ರಾಹಕ ಹಿತರಕ್ಷಣಾ ಪ್ರಾಧಿಕಾರ ಏನು ಹೇಳಿತ್ತು?ಕೇಂದ್ರೀಯ ಗ್ರಾಹಕ ಹಿತರಕ್ಷಣಾ ಪ್ರಾಧಿಕಾರವು (ಸಿಸಿಪಿಎ) ಹೋಟೆಲ್‌ ಮತ್ತು ರೆಸ್ಟೋರೆಂಟ್‌ಗಳು ಸೇವಾ ಶುಲ್ಕವನ್ನು ವಿಧಿಸದಂತೆ ಸೂಚಿಸಿತ್ತು. ಈ ಸಂಬಂಧ ಮಾರ್ಗಸೂಚಿಯನ್ನು ಬಿಡುಗಡೆ ಮಾಡಿದ್ದ ಪ್ರಾಧಿಕಾರ ಹೋಟೆಲ್‌ ಅಥವಾ ರೆಸ್ಟೋರೆಂಟ್‌ಗಳು ಆಹಾರದ ಬಿಲ್‌ನಲ್ಲಿ ಸ್ವಯಂಚಾಲಿತವಾಗಿ ಅಥವಾ ಡಿಫಾಲ್ಟ್‌ ಆಗಿ ಸೇವಾ ಶುಲ್ಕವನ್ನು ಸೇರಿಸುವುದಕ್ಕೆ ತಡೆಯೊಡ್ಡಿತ್ತು.

ಅಕ್ರಮ ವ್ಯಾಪಾರ ಪದ್ಧತಿ ಮತ್ತು ಗ್ರಾಹಕರ ಹಕ್ಕು ಉಲ್ಲಂಘಿಸುವ ಪದ್ಧತಿಯನ್ನು ನಿಲ್ಲಿಸಬೇಕು. ಯಾವುದೇ ಹೆಸರು ಅಥವಾ ನೆಪದಲ್ಲಿ ಸೇವಾ ಶುಲ್ಕವನ್ನು ಪಡೆಯಬಾರದು ಎಂದು ಕೇಂದ್ರೀಯ ಗ್ರಾಹಕ ಹಿತರಕ್ಷಣಾ ಪ್ರಾಧಿಕಾರ ತನ್ನ ನೂತನ ಮಾರ್ಗಸೂಚಿಯಲ್ಲಿ ಎಚ್ಚರಿಕೆ ನೀಡಿತ್ತು.

ಹೊಸ ಮಾರ್ಗಸೂಚಿಯಲ್ಲಿ ಏನಿತ್ತು?* ಹೋಟೆಲ್‌ ಅಥವಾ ರೆಸ್ಟೋರೆಂಟ್‌ಗಳು ಸೇವಾ ಶುಲ್ಕ ತೆರುವಂತೆ ಗ್ರಾಹಕರನ್ನು ಯಾವುದೇ ಕಾರಣಕ್ಕೂ ಒತ್ತಾಯಿಸಬಾರದು.* ಸೇವಾ ಶುಲ್ಕವು ವೈಯಕ್ತಿಕವಾಗಿದ್ದು, ಗ್ರಾಹಕರ ವಿವೇಚನೆಗೆ ಬಿಟ್ಟಿದ್ದು ಎನ್ನುವ ಅಂಶವನ್ನು ಹೋಟೆಲ್‌ಗಳು ಮತ್ತು ರೆಸ್ಟೋರೆಂಟ್‌ಗಳು ಸ್ಪಷ್ಟಪಡಿಸಬೇಕು.

Antony Raju A

Ncibtimesmedia Web Portal Director & national executive officer Contact:9482289151 Gmail: antonyraju166@gmail.com

Related Articles

Leave a Reply

Your email address will not be published. Required fields are marked *

Back to top button