ಮಂಡ್ಯದಲ್ಲಿ ಆಸ್ತಿಗಾಗಿ ಹೆಚ್‌ಐವಿ ಪೀಡಿತ ಗಂಡನನ್ನೇ ಗೃಹ ಬಂಧನದಲ್ಲಿರಿಸಿದ ಪತ್ನಿ, ಮಕ್ಕಳು: ಪೊಲೀಸರಿಂದ ರಕ್ಷಣೆ
ಹೆಚ್‌ಐವಿ ಪೀಡಿತ ಪತಿಗೆ ಆತನ ಪತ್ನಿ, ಮತ್ತು ಮಕ್ಕಳು ಮೂರು ತಿಂಗಳಿನಿಂದ ಗೃಹ ಬಂಧನದಲ್ಲಿಟ್ಟು ಹಿಂಸಿಸುತ್ತಿದ್ದ ಪ್ರಕರಣ ಸಕ್ಕರೆನಾಡು ಮಂಡ್ಯದಲ್ಲಿ ನಡೆದಿದೆ. ಪೊಲೀಸರ ನೆರವಿನ ಮೂಲಕ ಆತನನ್ನು ಆಕೆಯ ಸಹೋದರಿ ಗೃಹ ಬಂಧನದಿಂದ ರಕ್ಷಣೆ ಮಾಡಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.
ಹೌದು, ಮಂಡ್ಯದ 100 ಫೀಟ್ ರಸ್ತೆಯ ಬಳಿ ಇರುವ ವಿದ್ಯಾ ನಗರದಲ್ಲಿ ಆಸ್ತಿ ಆಸೆಗಾಗಿ ಹೆಚ್‌ಐವಿ ಪೀಡಿತ ಗಂಡನನ್ನೇ ಆತನ ಪತ್ನಿ ಹಾಗೂ ಮಕ್ಕಳು ಮನೆಯ ಶೆಡ್ ನಲ್ಲಿ ಕೂಡಿ ಹಾಕಿದ್ದಾರೆ.
ಆರೋಗ್ಯ ಸರಿ ಇಲ್ಲದಿರುವ ಆತನಿಗೆ ಚಿಕಿತ್ಸೆ ಕೊಡಿಸದೆ ಸರಿಯಾಗಿ ಮನೆಯಲ್ಲಿ ನೋಡಿಕೊಳ್ತಿಲ್ಲ ಎಂದು ಗೃಹ ಬಂಧನದಲ್ಲಿದ್ದ ವ್ಯಕ್ತಿಯ ಸಹೋದರಿ ಪುಟ್ಟ ತಾಯಮ್ಮ ಕಣ್ಣೀರಾಕ್ತಾ ತನ್ನ ತಮ್ಮನಿಗೆ ರಕ್ಷಣೆ ಕೊಡಿಸುವಂತೆ ಮಾಧ್ಯಮಗಳ ಬಳಿ ತಮ್ಮ ಸಮಸ್ಯೆ ಹೇಳಿಕೊಂಡು ಕಣ್ಣೀರಾಕಿದ್ದರು.
ಇನ್ನು ಈ ಕುರಿತಾಗಿ ಪೊಲೀಸರಿಗೆ ಸಹಾಯಕ್ಕೆ ಕರೆ ಮಾಡಿದ ಮಹಿಳೆ ಪೊಲೀಸರ ಜೊತೆ ತನ್ನ ತಮ್ಮನಿದ್ದ ಮನೆಗೆ ರಕ್ಷಣೆಗೆ ತೆರಳಿದ್ರು. ಈ ವೇಳೆ ಮನೆಯಲ್ಲಿ ಕೆಲಕಾಲ ಹೈಡ್ರಾಮ ನಡೆಯಿತು.
ಗೃಹ ಬಂಧನದಲ್ಲಿದ್ದ ವ್ಯಕ್ತಿ ಹಾಗೂ ಅವನ ರಕ್ಷಣೆಗೆ ಹೋದವರ ಮೇಲೆ ಗೃಹ ಬಂಧನದಲ್ಲಿಟ್ಟಿದ್ದ ಹೆಂಡತಿ ಮತ್ತು ಮಕ್ಕಳು ಕೂಗಾಡಿ ಕಿರುಚಾಡುತ್ತಾ ಹೈಡ್ರಾಮ ಮಾಡಿದ್ರು.
ಬಳಿಕ ಪೊಲೀಸರು ಎಲ್ಲರನ್ನು ಸುಮ್ಮನಿರಿಸಿ ಗೃಹ ಬಂಧನದಲ್ಲಿದ್ದ ವ್ಯಕ್ತಿಯ ವಿಚಾರಣೆ ನಡೆಸಿದರು. ಈ ವೇಳೆ ತನ್ನನ್ನು ಗೃಹಬಂಧನದಲ್ಲಿರಿಸಿರುವುದಾಗಿ ಶಿವಸ್ವಾಮಿ ಪೊಲೀಸರಿಗೆ ಹೇಳಿಕೆ ನೀಡಿದ್ದು, ತನಗೆ ರಕ್ಷಣೆ ಮತ್ತು ಚಿಕಿತ್ಸೆ ಕೊಡಿಸುವಂತೆ ಮನವಿ ಮಾಡಿದ್ದಾನೆ.
ಇನ್ನು ತನ್ನ ಪತಿ ಶಿವಸ್ವಾಮಿಯನ್ನು ಗೃಹಬಂಧನಲ್ಲಿ ಇರಿಸಿದ್ದರ ಬಗ್ಗೆ ಸ್ಪಷ್ಟನೆ ಕೊಟ್ಟ ಪತ್ನಿ ಜಯಲಕ್ಷ್ಮಿ ಮತ್ತು ಮಗಳು ಪವಿತ್ರ, ತಾವು ಉದ್ದೇಶಪೂರ್ವಕವಾಗಿ ಅವರನ್ನ ಗೃಹ ಬಂಧನದಲ್ಲಿ ಇರಿಸಿಲ್ಲ.
ಅವರಿಗೆ ಅಪಘಾತವಾಗಿ ಕಾಲು ಮುರಿದಿದೆ. ಜೊತೆಗೆ ಅವರಿಗೆ ಎಚ್ಐವಿ ಇದೆ. ಹಾಗಾಗಿ ಚಿಕಿತ್ಸೆಗೆ ಆಸ್ಪತ್ರೆಯಲ್ಲಿ ದಾಖಲಿಸಿಕೊಳ್ಳುತ್ತಿಲ್ಲ. ಇಲ್ಲೆ ನಾವು ನೋಡಿಕೊಳ್ಳುತ್ತಿದ್ದೇವೆ ಎಂದರು.
ಅಷ್ಟೇ ಅಲ್ಲದೆ, ಆಸ್ತಿ ಆಸೆಗಾಗಿ ಅವರ ಅಕ್ಕ-ತಂಗಿಯರು ಇದೀಗ ನಮ್ಮ ಮೇಲೆ ಈ ರೀತಿ ಆರೋಪ ಮಾಡ್ತಿರೋದಾಗಿ ತಿಳಿಸಿ ಆರೋಪಿಸಿ ಆಕ್ರೋಶ ವ್ಯಕ್ತಪಡಿಸಿದರು. ಒಟ್ಟಾರೆ ಕಳೆದ ಮೂರು ತಿಂಗಳಿನಿಂದ ತನ್ನ ಹೆಂಡತಿ, ಮಕ್ಕಳು ತನ್ನನ್ನು ಸರಿಯಾಗಿ ನೋಡಿಕೊಳ್ಳುತ್ತಿಲ್ಲ. ತನ್ನನ್ನು ಗೃಹ ಬಂಧನದಲ್ಲಿರಿಸಿದ್ದಾರೆಂಬ ದೂರಿ‌ನ ಮೇರೆಗೆ ಪೊಲೀಸರು ವ್ಯಕ್ತಿಯನ್ನು ರಕ್ಷಣೆ ಮಾಡಿದ್ದು, ಆಸ್ಪತ್ರೆಗೆ ದಾಖಲಿಸಿದ್ದಾರೆ.
