ಅಂತಾರಾಷ್ಟ್ರೀಯ

ಬ್ರಿಟನ್ ರಾಣಿ 96 ವರ್ಷದ ಎಲಿಜಬೆತ್‌-II ಇನ್ನಿಲ್ಲ!

ಲಂಡನ್‌: ಸುದೀರ್ಘ ಕಾಲ ಬ್ರಿಟನ್ನಿನ ರಾಣಿಯಾಗಿದ್ದ 96 ವರ್ಷದ ಎಲಿಜಬೆತ್ ಅವರು ಗುರುವಾರ ಮಧ್ಯಾಹ್ನ ಬಲ್ಮೋರಲ್‌ನಲ್ಲಿ ನಿಧನ ಹೊಂದಿದ್ದಾರೆ ಎಂದು ಬ್ರಿಟನ್‌ನ ಬಕಿಂಗ್‌ ಹ್ಯಾಮ್‌ ಅರಮನೆಯ ಮೂಲಗಳು ತಿಳಿಸಿವೆ.
ವಯೋಸಹಜ ಅನಾರೋಗ್ಯದಿಂದ ಬಳಲುತ್ತಿದ್ದ ರಾಣಿ ಎಲಿಜಬೆತ್‌ ಅವರಿಗೆ ಸೂಕ್ತ ವೈದ್ಯಕೀಯ ನಿಗಾವಣೆಯೊಂದಿಗೆ ಚಿಕಿತ್ಸೆ ನೀಡಲಾಗುತ್ತಿತ್ತು. ಎಲಿಜಬೆತ್ ಅವರು ವೈದ್ಯಕೀಯ ಮೇಲ್ವಿಚಾರಣೆಯಲ್ಲೇ ಇದ್ದಾರೆ ಎಂದು ಇಂದು ಸಂಜೆತನಕ ಹೇಳಲಾಗುತ್ತಿತ್ತು. ವೈದ್ಯರು ಕೂಡ ಅವರ ಆರೋಗ್ಯದ ಬಗ್ಗೆ ಆತಂಕಕ್ಕೆ ಒಳಗಾಗಿದ್ದಾರೆ ಎಂದು ತಿಳಿದುಬಂದಿತ್ತು.


ಬ್ರಿಟನ್‌ನ ದೀರ್ಘಾವಧಿಯ ರಾಣಿ ಎಂದೇ ಪ್ರಸಿದ್ಧಿ ಹೊಂದಿದ್ದ ರಾಣಿ ಎಲಿಜಬೆತ್ ಅವರು ಜಾಗತಿಕ ಮಟ್ಟದಲ್ಲಿ ಪ್ರಭಾವಿ ನಾಯಕಿ ಎಂಬ ಖ್ಯಾತಿ ಹೊಂದಿದ್ದರು. ಆದರೆ ಇದೀಗ ಅವರು ತಮ್ಮ 96ನೇ ವಯಸ್ಸಿನಲ್ಲಿ ವೈದ್ಯರ ಚಿಕಿತ್ಸೆಗೆ ಸ್ಪಂದಿಸದೆ ನಿಧನ ಹೊಂದಿದ್ದಾರೆ. ಕ್ವೀನ್ ಎಲಿಜಬೆತ್ ಅವರ ನಿಧನಕ್ಕೆ ವಿಶ್ವಾದ್ಯಂತ ಗಣ್ಯರು ಸಂತಾಪ ಸೂಚಿಸುತ್ತಿದ್ದಾರೆ.

ದೇಶವೇ ಕಳವಳಗೊಂಡಿದೆ
ಕ್ವೀನ್ ಎಲಿಜಬೆತ್ ಅವರ ಆರೋಗ್ಯ ಪರಿಸ್ಥಿತಿ ಗಂಭೀರವಾಗಿದ್ದಾಗ ಮಧ್ಯಾಹ್ನ ಪ್ರತಿಕ್ರಿಯೆ ನೀಡಿದ್ದ ಬ್ರಿಟನ್‌ನ ನೂತನ ಪ್ರಧಾನಿ ಲೀಸ್ ಟ್ರಸ್, ಇಡೀ ದೇಶವೇ ರಾಣಿಯವರ ಆರೋಗ್ಯದ ಕುರಿತು ಕಳವಳಗೊಂಡಿದೆ. ಮಧ್ಯಾಹ್ನದ ವೇಳೆಗೆ ಬಂಕಿಂಗ್‌ ಹ್ಯಾಮ್ ಪ್ಯಾಲೇಸ್‌ನಿಂದ ಹೊರಬಿದ್ದ ಸುದ್ದಿ ಕೇಳಿ ಆತಂಕಿತರಾಗಿದ್ದೇವೆ. ನನ್ನನ್ನೂ ಒಳಗೊಂಡಂತೆ ಇಡೀ ದೇಶವು ರಾಣಿ ಎಲಿಜಬೆತ್-II ಹಾಗೂ ಅವರ ಕುಟುಂಬಸ್ಥರ ಜೊತೆಗೆ ಇದೆ’ ಎಂದು ಹೇಳಿದ್ದರು.
ಬುಧವಾರ ರಾಣಿ ಎಲಿಜಬೆತ್-II ಅವರು ಕೆಲವು ಮಹತ್ವದ ಸಭೆಗಳನ್ನು ರದ್ದುಪಡಿಸಿದ್ದರು. ಈ ಕುರಿತು ಸಿಎನ್‌ಎನ್‌ನಲ್ಲಿ ವರದಿ ಪ್ರಸಾರವಾಗಿತ್ತು. ಈ ವೇಳೆ ವೈದ್ಯರು ರಾಣಿ ಅವರಿಗೆ ವಿಶ್ರಾಂತಿ ಪಡೆಯುವಂತೆ ಸಲಹೆ ನೀಡಿದ್ದರು ಎಂಬ ಮಾಹಿತಿ ಲಭ್ಯವಾಗಿತ್ತು. 96 ವರ್ಷ ವಯಸ್ಸಿನ ರಾಣಿ ಎಲಿಜಬೆತ್-II ಅವರು ಕೆಲವು ಗೌಪ್ಯ ಮಂಡಳಿಗಳ ಮಹತ್ವದ ಸಭೆಗಳಿಗೆ ವರ್ಚ್ಯುವಲ್‌ ಆಗಿ ಭಾಗಿಯಾಗಬೇಕಿತ್ತು. ಬ್ರಿಟನ್‌ ಪ್ರಧಾನಿಯಾಗಿ ಲೀಸ್ ಟ್ರಸ್ ಅವರು ನೂತನವಾಗಿ ನೇಮಕವಾದ ಹಿನ್ನೆಲೆಯಲ್ಲಿ ಈ ಸಭೆಗಳು ಮಹತ್ವ ಪಡೆದುಕೊಂಡಿದ್ದವು. ಆದರೆ ಇದೀಗ ಅವರು ಕೊನೆಯುಸಿರೆಳೆದಿದ್ದಾರೆ.

Related Articles

Leave a Reply

Your email address will not be published. Required fields are marked *

Back to top button