ಫೇಸ್‌ಬುಕ್‌ ಎಡವಟ್ಟು, ರಾತ್ರೋ ರಾತ್ರಿ ಫಾಲೋವರ್ಸ್‌ ಸಂಖ್ಯೆ ಭಾರೀ ಕುಸಿತ
ಹೊಸದಿಲ್ಲಿ: ನಿಮ್ಮ ಫೇಸ್‌ಬುಕ್‌ ಹಿಂಬಾಲಕರ (ಫಾಲೋವರ್ಸ್‌) ಸಂಖ್ಯೆ ಏಕಾಏಕಿ ಇಳಿಕೆಯಾಗಿದೆಯೇ? ಇದು ನಿಮ್ಮ ಸಮಸ್ಯೆ ಮಾತ್ರವಲ್ಲ!
ಏಕೆಂದರೆ, ವಿಶ್ವದಾದ್ಯಂತ ಫೇಸ್‌ಬುಕ್‌ ಖಾತೆದಾರರು ಗಣನೀಯವಾಗಿ ಫಾಲೋವರ್ಸ್‌ಗಳನ್ನು ಕಳೆದುಕೊಳ್ಳುತ್ತಿರುವ ಸುದ್ದಿ ವರದಿಯಾಗಿದೆ.
ಫೇಸ್‌ಬುಕ್‌ನಲ್ಲಿನ ತಪ್ಪಿನಿಂದಾಗಿ ರಾತ್ರೋ ರಾತ್ರಿ ಲಕ್ಷಾಂತರ ಜನರ ಫೇಸ್‌ಬುಕ್‌ ಖಾತೆಗಳಿಂದ ಅರ್ಧ ಅಥವಾ ಅದಕ್ಕೂ ಹೆಚ್ಚು ಫಾಲೋವರ್ಸ್‌ ಸಂಖ್ಯೆ ಕುಸಿದಿದೆ.
ಸ್ವತಃ ಫೇಸ್‌ಬುಕ್‌ ಮಾಲೀಕ ಮಾರ್ಕ್ ಜುಕರ್‌ಬರ್ಗ್‌ ಅವರ ಖಾತೆಯಿಂದಲೇ ಬರೋಬ್ಬರಿ 10 ಕೋಟಿ ಫಾಲೋವರ್ಸ್‌ ಕಡಿಮೆಯಾಗಿದ್ದಾರೆ!
ಸುಮಾರು 10 ಕೋಟಿ ಫಾಲೋವರ್‌ಗಳನ್ನು ಹೊಂದಿದ್ದ ಜುಕರ್‌ಬರ್ಗ್‌ ಅವರನ್ನು ಈಗ ಕೇವಲ 9,995 ಜನರು ಹಿಂಬಾಲಿಸುತ್ತಿದ್ದಾರೆ.
ಇತ್ತೀಚೆಗೆ ಬರೀ ಸೆಲೆಬ್ರಿಟಿಗಳು ಹಾಕುವ ಪೋಸ್ಟ್‌ಗಳನ್ನು ಮಾತ್ರ ತೋರಿಸಿ ವಿವಾದಕ್ಕೀಡಾಗಿದ್ದ ಫೇಸ್‌ಬುಕ್‌, ಈಗ ಹೊಸ ವಿವಾದಕ್ಕೆ ಸಿಲುಕಿದೆ.
ಫೇಸ್‌ಬುಕ್‌ನಲ್ಲಿ ತಮ್ಮ ಫಾಲೋವರ್‌ಗಳು ಏಕಾಏಕಿ ಕಣ್ಮರೆಯಾಗುತ್ತಿರುವ ಬಗ್ಗೆ ವಿಶ್ವದಾದ್ಯಂತ ಹಲವು ಫೇಸ್‌ಬುಕ್‌ ಬಳಕೆದಾರರು ಫೇಸ್‌ಬುಕ್‌, ಟ್ವಿಟ್ಟರ್‌ ಸೇರಿ ನಾನಾ ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಸಮಾಧಾನ ಹೊರ ಹಾಕುತ್ತಿದ್ದಾರೆ.
ಫೇಸ್‌ಬುಕ್‌ನಲ್ಲಿ ಕಂಡುಬಂದಿರುವ ಒಂದು ಬಗ್‌ನಿಂದ (ಸಾಫ್ಟ್‌ವೇರ್‌ ದೋಷ) ಖಾತೆದಾರರ ಫಾಲೋವರ್ಸ್‌ ಸಂಖ್ಯೆ ಗಣನೀಯ ಕುಸಿತವಾಗಿರಬಹುದು,” ಎಂಬುದು ಟೆಕ್‌ ತಜ್ಞರ ಅಂದಾಜು. ಈ ಸಮಸ್ಯೆ ಶೀಘ್ರದಲ್ಲೇ ಶಮನಗೊಳ್ಳಬಹುದು ಎಂದು ಟೆಕ್‌ ತಜ್ಞರು ಹೇಳಿದ್ದಾರೆ.
ಹ್ಯಾಕ್‌ ಆಗಿದೆಯಾ ಎಂಬ ಕಳವಳ!ಕಳೆದ ಒಂದು ವಾರದಿಂದ ಅಮೆರಿಕದ ಪ್ರಖ್ಯಾತ ಸುದ್ದಿ ವಾಹಿನಿಗಳಾದ ವಿಂಡೋಸ್‌ ಟೈಮ್ಸ್‌, ವಾಷಿಂಗ್ಟನ್‌ ಪೋಸ್ವ್‌, ಹಫಿಂಗ್ಟನ್‌ ಪೋಸ್ವ್‌, ದಿ ಹಿಲ್‌, ಯುಎಸ್‌ಡಿಎ ಟುಡೇ, ನ್ಯೂಯಾರ್ಕ್ ಪೋಸ್ವ್‌ ಹಾಗೂ ನ್ಯೂಸ್‌ವೀಕ್‌ನ ಫೇಸ್‌ಬುಕ್‌ ಪುಟಗಳಲ್ಲಿ ಫಾಲೋವರ್ಸ್‌ ಸಂಖ್ಯೆ ಕೂಡ ಕಡಿಮೆಯಾಗಿದೆ.
ಭಾರತ, ಅಮೆರಿಕ ಮತ್ತು ಯುಕೆ ಸೇರಿದಂತೆ ಜಗತ್ತಿನ ಹಲವು ದೇಶಗಳ ನೆಟ್ಟಿಗರು ಇಂಥದ್ದೇ ಸಮಸ್ಯೆ ಎದುರಿಸುತ್ತಿದ್ಧಾರೆ. ಇವರಲ್ಲಿ ಬಹುತೇಕರು ಫೇಸ್‌ಬುಕ್‌ ಹ್ಯಾಕ್‌ ಆಗಿದೆಯಾ ಎಂದು ಪ್ರಶ್ನಿಸುತ್ತಿದ್ದಾರೆ.
