ಉತ್ತಮ ವೇತನ ಕೊಟ್ಟು ನನಗೆ ಸೂಕ್ತ ಕೆಲಸ ನೀಡದೆ ನನ್ನನ್ನು ಖಾಲಿ ಕೂರಿಸಿದ್ದಾರೆ ಎಂದು ವ್ಯಕ್ತಿಯೊಬ್ಬ ಕಂಪನಿ ವಿರುದ್ಧ ಕೋರ್ಟ್‌ ಮೆಟ್ಟಿಲೇರಿರುವ ಘಟನೆ ಐರ್ಲೆಂಡ್‌ನಲ್ಲಿ ನಡೆದಿದೆ.ಐರಿಷ್‌ರೈಲ್‌ನಲ್ಲಿ ಉದ್ಯೋಗಿಯಾಗಿರುವ ಡೆರ್ಮೋಟ್‌ ಅಲೆಸ್ಟರ್ ಮಿಲ್ಸ್ ಕಂಪೆನಿ ವಿರುದ್ಧ ಕೋರ್ಟ್‌ಗೆ ಹೋದ ವ್ಯಕ್ತಿ.
ಐರಿಷ್‌ರೈಲ್‌‘ನಲ್ಲಿ ಹಣಕಾಸು ಅಧಿಕಾರಿಯಾಗಿರುವ ಮಿಲ್ಸ್‌ಗೆ ವಾರ್ಷಿಕ ₹ 1.03 ಕೋಟಿ ವೇತನ ಇದ್ದು, ತನಗೆ ಏನೂ ಕೆಲಸ ನೀಡದೇ ಸುಮ್ಮನೇ ಕೂರಿಸುತ್ತಾರೆ ಎನ್ನುವುದು ಆತನ ಆಕ್ಷೇಪ.ಪ್ರತಿ ದಿನ 10 ಗಂಟೆಗೆ ಕಚೇರಿಗೆ ಹೋಗಿ ಎರಡು ದಿನಪತ್ರಿಕೆ ಹಾಗೂ ಸ್ಯಾಂಡ್‌ವಿಚ್ ಖರೀದಿ ಮಾಡುತ್ತೇನೆ.
ಪತ್ರಿಕೆ ಓದಿ, ಸ್ಯಾಂಡ್‌ವಿಚ್ ತಿಂದು ವಾಕಿಂಗ್‌ ಮಾಡುತ್ತೇನೆ. 10.30ಕ್ಕೆ ಕೆಲಸ ಸಂಬಂಧ ಏನಾದರೂ ಮೇಲ್‌ಗಳಿದ್ದರೆ ಉತ್ತರಿಸುತ್ತೇನೆ ಎಂದು ಕೋರ್ಟ್‌ಗೆ ವಿವರಿಸಿದ್ದಾರೆ.9 ವರ್ಷದ ಹಿಂದೆ ಕಂಪನಿಯ ಲೆಕ್ಕಾಚಾರದ ಬಗ್ಗೆ ಪ್ರಶ್ನೆ ಮಾಡಿದ್ದಕ್ಕೆ, ನನಗೆ ದಂಡ ವಿಧಿಸಿದ್ದರು.
ಹೀಗಾಗಿ ನನಗೆ ಯಾವುದೇ ಕೆಲಸ ನೀಡದೇ ಸತಾಯಿಸುತ್ತಿದ್ದಾರೆ ಎನ್ನುವುದು ಮಿಲ್ಸ್ ಅಲವತ್ತುಕೊಂಡಿದ್ದಾರೆ. ಅಲ್ಲದೇ ತನಗೆ ಸೂಕ್ತವಾದ ಕೆಲಸ ನೀಡಿದರೆ ಉತ್ಸಾಹದಿಂದ ಕೆಲಸ ಮಾಡುವುದಾಗಿ ಮಿಲ್ಸ್ ಕೋರ್ಟ್‌ಗೆ ಹೇಳಿದ್ದಾರೆ.
