ತೆರೆಮೇಲೆ ಪುನೀತ್ ಅವರನ್ನು ಕಂಡು ಫ್ಯಾನ್ಸ್ ಭಾವುಕ: ಲಕ್ಕಿ ಮ್ಯಾನ್

ಅಭಿಮಾನಿಗಳ ಪಾಲಿಗೆ ಅಪ್ಪು ದೇವರಾಗಿದ್ದಾರೆ. ಈಗ ತೆರೆಯ ಮೇಲೂ ದೇವರಾಗಿ ನಟಿಸಿದ್ದು, ಅದು ಕಳೆದ ಶುಕ್ರವಾರ (ಸೆ.9) ‘ಲಕ್ಕಿಮ್ಯಾನ್‌’ ಸಿನಿಮಾ ಬಿಡುಗಡೆಯಾಗಿ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದೆ.

ಪುನೀತ್‌ ಅವರನ್ನು ತೆರೆಮೇಲೆ ದೇವರಾಗಿ ನೋಡಿದ ಅಭಿಮಾನಿಗಳು ಭಾವನಾತ್ಮಕವಾಗಿ ಸಿನಿಮಾದೊಂದಿಗೆ ಕನೆಕ್ಟ್ ಆಗುತ್ತಿದ್ದಾರೆ.

ಆರತಿ ಬೆಳಗಿದ ಅಪ್ಪು ಅಭಿಮಾನಿಗಳು’ಡಾರ್ಲಿಂಗ್‌’ ಕೃಷ್ಣ ನಾಯಕರಾಗಿರುವ ‘ಲಕ್ಕಿಮ್ಯಾನ್‌’ ಸಿನಿಮಾದಲ್ಲಿ ಪುನೀತ್‌ ರಾಜ್‌ಕುಮಾರ್‌ ದೇವರ ಪಾತ್ರದಲ್ಲಿ ನಟಿಸಿದ್ದಾರೆ.

ಹಾಗಂತ ಅವರು ಪೌರಾಣಿಕ ಕಾಸ್ಟ್ಯೂಮ್‌ನಲ್ಲಿ ಇಲ್ಲ. ಬದಲಿಗೆ ಮಾಡರ್ನ್‌ ದೇವರಾಗಿದ್ದಾರೆ. ಶುಕ್ರವಾರ ಕರ್ನಾಟಕದ ಎಲ್ಲಾ ಚಿತ್ರಮಂದಿರಗಳಲ್ಲಿಯೂ ಅಭಿಮಾನಿಗಳು ಅಪ್ಪುವನ್ನು ದೇವರಾಗಿ ನೋಡಿ ಭಾವುಕರಾಗಿದ್ದಾರೆ.

ಎಷ್ಟೋ ಜನ ಅಭಿಮಾನಿಗಳು ಚಿತ್ರಮಂದಿರದಲ್ಲಿ ಕಣ್ಣೀರು ಸುರಿಸಿದ್ದಾರೆ. ಇನ್ನು ಕೆಲವು ಕಡೆಗಳಲ್ಲಿ ಕರ್ಪೂರದ ಆರತಿ ಬೆಳಗಲಾಗಿದೆ.

ನನಗೆ ಕಣ್ಣೀರು ಬರುತ್ತದೆ- ಕೃಷ್ಣ ‘ಲಕ್ಕಿಮ್ಯಾನ್‌ ಸಿನಿಮಾ ಆಗಿ ಉಳಿದುಕೊಂಡಿಲ್ಲ. ಇದು ಒಂದು ವಿಶೇಷ ಅನುಭವವಾಗಿದೆ.

ನಾನು ಮಲ್ಟಿಪ್ಲೆಕ್ಸ್‌ ಮತ್ತು ಕೆಲ ಚಿತ್ರಮಂದಿರಗಳಿಗೆ ಭೇಟಿ ನೀಡಿದಾಗ ಅಲ್ಲಿ ಹೆಣ್ಣುಮಕ್ಕಳು ಅಪ್ಪು ಅಪ್ಪು ಎಂದು ಕೂಗುವುದನ್ನು ನೋಡಿ, ಈ ಮನುಷ್ಯ ಎಷ್ಟು ಜನರ ಪ್ರೀತಿಯನ್ನು ಪಡೆದುಕೊಂಡಿದ್ದಾರೆ ಎನಿಸುತ್ತದೆ.

ಸೋಷಿಯಲ್‌ ಮೀಡಿಯಾದಲ್ಲಿ ಅಭಿಮಾನಿಗಳು ಸಿನಿಮಾ ಬಗ್ಗೆ ಮತ್ತು ಅಪ್ಪು ಬಗ್ಗೆ ಬರೆದು ಟ್ಯಾಗ್‌ ಮಾಡುತ್ತಿದ್ದಾರೆ. ಅದನ್ನು ನೋಡಿದರೆ ನನಗೆ ಕಣ್ಣೀರು ಬರುತ್ತದೆ.

ಅವರನ್ನು ತೆರೆ ಮೇಲೆ ನೋಡಿದಾಗ ನನಗೇ ಶಿಳ್ಳೆ ಹೊಡೆಯಬೇಕು ಎನಿಸುತ್ತದೆ. ಈ ಸಿನಿಮಾದಲ್ಲಿ ಅವರು ಹಲವು ಬಾರಿ ನಕ್ಕಿದ್ದಾರೆ’ ಎಂದು ಹೇಳುತ್ತಾರೆ ನಾಯಕ ನಟ ಕೃಷ್ಣ.

ಬೆಂಗಳೂರಿನ ನರ್ತಕಿ ಥಿಯೇಟರ್‌ನಲ್ಲಿ ಸಿನಿಮಾ ನೋಡಿದ ಅಪ್ಪು ಅವರ ಅಭಿಮಾನಿ ರಮೇಶ್‌ ಮಾತನಾಡಿ, ‘ಅಪ್ಪು ಅವರ ಡ್ಯಾನ್ಸ್‌ ಮತ್ತು ಅವರ ಸ್ಕ್ರೀನ್‌ ಪ್ರೆಸೆನ್ಸ್‌ ಅನ್ನು ತೆರೆಮೇಲೆ ನೋಡುವುದೇ ಒಂದು ಚೆಂದ.

ಅವರು ಡ್ಯಾನ್ಸ್‌ ಮಾಡುತ್ತಿದ್ದರೆ ನಾವೆಲ್ಲರೂ ತೆರೆ ಮುಂದೆ ನಿಂತು ನೃತ್ಯ ಮಾಡಿದ್ದೇವೆ. ಅವರ ಡ್ಯಾನ್ಸ್‌ ಅನ್ನು ಕೊನೆ ಬಾರಿಗೆ ನೋಡಿದ ಖುಷಿ ಮತ್ತು ಬೇಸರ ಎರಡೂ ನಮಗೆ ಆಯಿತು’ ಎನ್ನುತ್ತಾರೆ.

ಅಪ್ಪು ಮತ್ತು ಪ್ರಭುದೇವ ಅವರ ಡ್ಯಾನ್ಸ್‌ ಬಂದಾಗ ಜನ ಶಿಳ್ಳೆ ಹೊಡೆದು ಡ್ಯಾನ್ಸ್‌ ಮಾಡುತ್ತಾರೆ. ಅದು ಮುಗಿದ ತಕ್ಷಣ ಅಪ್ಪು ಸರ್‌ ನಟಿಸಿದ್ದ ಅಷ್ಟೂ ದೃಶ್ಯಗಳ ಮೇಕಿಂಗ್‌ ವಿಡಿಯೋ ಪ್ಲೇ ಆಗುತ್ತದೆ.

ಆಗ ಇಡೀ ಚಿತ್ರಮಂದಿರದಲ್ಲಿ ಸೂಜಿ ಬಿದ್ದರೂ ಕೇಳಿಸುವಷ್ಟು ನಿಶ್ಯಬ್ದ ಇರುತ್ತದೆ. ಪ್ರತಿಯೊಬ್ಬ ಪ್ರೇಕ್ಷಕರೂ ಅವನ್ನು ನೋಡುತ್ತಾ ಬೇಸರ ಮಾಡಿಕೊಂಡು ಚಿತ್ರಮಂದಿರದಿಂದ ಹೊರ ಹೋಗುತ್ತಾರೆ.

‘ಲಕ್ಕಿಮ್ಯಾನ್‌’ ನನ್ನ ಸಿನಿಮಾವಲ್ಲ, ಅಪ್ಪು ಅವರ ಸಿನಿಮಾ.- ‘ಡಾರ್ಲಿಂಗ್‌’ ಕೃಷ್ಣ, ನಟಅಪ್ಪು ಅಭಿಮಾನಿಗಳ ಸಂಭ್ರಮವನ್ನು ನೋಡುತ್ತಿದ್ದರೆ ಇಂತಹ ಒಂದು ಸಿನಿಮಾದಲ್ಲಿ ನಾನು ನಟಿಸಿದೆನಲ್ಲ ಎಂದು ಖುಷಿಯಾಗುತ್ತದೆ.

ನಾನು ಸಿನಿಮಾ ನೋಡಿದ ಚಿತ್ರಮಂದಿರದಲ್ಲಿ ಪಟಾಕಿ ಹೊಡೆದು, ದೇವರನ್ನು ಬರ ಮಾಡಿಕೊಂಡರು.