Weatherರಾಜ್ಯಹವಾಮಾನ

ಚಾಮರಾಜನಗರದಲ್ಲಿ ಭಾರಿ ಮಳೆಗೆ 107 ಮನೆ ಕುಸಿತ; 1531 ಹೆಕ್ಟೇರ್‌ ಬೆಳೆ ಜಲಾವೃತ

ಚಾಮರಾಜನಗರ: ಜಿಲ್ಲೆಯಲ್ಲಿ ಕಳೆದ ಮೂರ್ನಾಲ್ಕು ದಿನಗಳಲ್ಲಿ ಸಾಕಷ್ಟು ಮಳೆಯಾಗಿದ್ದು, ಮೂರ್ನಾಲ್ಕು ದಿನಗಳ ಅಂತರದಲ್ಲೇ 107 ಮನೆಗಳು ಭಾಗಶಃ ಕುಸಿತಕ್ಕೆ ಒಳಗಾಗಿದ್ದರೆ ಕೃಷಿ ಹಾಗೂ ತೋಟಗಾರಿಕೆ ಬೆಳೆ ಸೇರಿದಂತೆ ಒಟ್ಟು 1531 ಹೆಕ್ಟೇರ್‌ ಬೆಳೆ ಜಲಾವೃತಗೊಂಡಿದೆ.ಜಿಲ್ಲೆಯಲ್ಲಿ ಕಳೆದ ಒಂದೆರಡು ದಶಕಗಳಿಗೆ ಹೋಲಿಕೆ ಮಾಡಿದರೆ ಮೂರ್ನಾಲ್ಕು ದಿನಗಳ ಅಂತರದಲ್ಲಿ ದಾಖಲೆ ಮಳೆ ಸುರಿದಿದೆ.

ಕಳೆದ 7 ದಿನಗಳ ಅಂಕಿ, ಅಂಶಗಳನ್ನೇ ತೆಗೆದುಕೊಳ್ಳುವುದಾದರೆ ಈ ಅವಧಿಯಲ್ಲಿ ಜಿಲ್ಲೆಯ ವಾಡಿಕೆ ಮಳೆ ಕೇವಲ 18.6 ಮಿ.ಮೀ. ಆಗಬೇಕಿತ್ತು. ಆದರೆ, ಸದ್ಯ ಬಿದ್ದಿರುವ ಮಳೆ 112 ಮಿ.ಮೀ. ಮಳೆ ದಾಖಲಾಗಿದೆ ಎನ್ನುತ್ತಾರೆ ಜಿಲ್ಲಾವಿಪತ್ತು ನಿರ್ವಹಣಾ ವಿಭಾಗದ ಅಧಿಕಾರಿಗಳು.

ಹಾಗೆ ನೋಡಿದರೆ ಕಳೆದ ಮಾರ್ಚ್ ಅಂತ್ಯದಿಂದಲೂ ಮಳೆ ಬೀಳುತ್ತಲೇ ಇದೆ. ಈ ಅವಧಿಯಲ್ಲಿ ಸತತ ಒಂದು ವಾರಗಳ ಕಾಲ ಮಳೆ ಬಿದ್ದಿಲ್ಲ ಎಂಬಂತಹ ವಾತಾವರಣವೇ ಎದುರಾಗಿಲ್ಲ. ಮಳೆ ಸತತವಾಗಿ ಬೀಳುತ್ತಲೇ ಇದೆ. ಅದರಲ್ಲೂ ಕಳೆದ ಆ.27 ಹಾಗೂ 28ರಂದು ಬಿದ್ದ ಮಳೆಯಂತೂ ಈಚಿನ ವರ್ಷಗಳಲ್ಲೇ ಅತ್ಯಧಿಕ.

ಈ ಎರಡ್ಮೂರು ಮಳೆಗೆ ಜಲಾಶಯಗಳು, ಹೊಳೆ, ಕೆರೆಗಳು ಉಕ್ಕಿ ಹರಿದವು. ಜಿಲ್ಲೆಯ ಯಳಂದೂರು ತಾಲೂಕಿನಲ್ಲಿ ಪ್ರವಾಹ ಉಂಟಾಗಿದೆ. ಕೊಳ್ಳೇಗಾಲದ ಒಂದು ಭಾಗದ ಹಳ್ಳಿಗಳ ಪರಿಸ್ಥಿತಿ ಚಿಂತಾಜನಕವಾಗಿದೆ.

ಜಿಲ್ಲಾಕೇಂದ್ರದ ತಗ್ಗು ಪ್ರದೇಶಗಳಲ್ಲಿನ ಬಡಾವಣೆಗಳ ಜನ ಮಳೆಯಿಂದಾಗಿ ತಮ್ಮ ಮನೆಗಳು ಜಲಾವೃತಗೊಂಡ ಪರಿಣಾಮ ಪರದಾಡಿದ್ದಾರೆ.

ಇಡೀ ಜಿಲ್ಲೆಯಲ್ಲಿ ಒಂದೇ ಕಾಲಕ್ಕೆ ಇಂಥ ಪರಿಸ್ಥಿತಿ ನಿರ್ಮಾಣವಾಗಿ ಬಹು ವರ್ಷಗಳೇ ಆಗಿದ್ದವು. ಆದರೀಗ ಅಂಥದ್ದೇ ಪರಿಸ್ಥಿತಿ ನಿರ್ಮಾಣವಾಗುವ ಮೂಲಕ ಜಿಲ್ಲಾಡಳಿತಕ್ಕೆ ಸವಾಲಾಗಿ ಪರಿಣಮಿಸಿದೆ.

ಜಮೀನುಗಳಲ್ಲಿನ ಫಸಲುಗಳು ಪೂರ್ಣ ಮುಳುಗಡೆಯಾಗಿ, ಬಹುತೇಕ ನಷ್ಟವಾಗಿದೆ. ಇನ್ನು ಇತ್ತ ತೆಂಗಿನ ತೋಟಗಳಲ್ಲಿ ಕೀಳಿಸಿ ರಾಶಿ ಹಾಕಿದ್ದ ಸಹಸ್ರಾರು ತೆಂಗಿನ ಕಾಯಿಗಳು ಹೊನ್ನುಹೊಳೆಯ ಪಾಲಾಗಿವೆ.

ವರ್ಷಗಟ್ಟಲೆ ಸುವರ್ಣಾವತಿ ನದಿಯಲ್ಲಿ ನೀರು ಕಾಣದ ದಿನಗಳು ಸಾಕಷ್ಟು. ಆದರೀಗ ಸುವರ್ಣಾವತಿ ತುಂಬಿ ಹರಿಯುತ್ತಿದ್ದು, ಅಚ್ಚುಕಟ್ಟು ವ್ಯಾಪ್ತಿಯ ರೈತರು ಪ್ರವಾಹ ತಗ್ಗಿದರೆ ಸಾಕಪ್ಪ ಎಂಬಂತಹ ಪರಿಸ್ಥಿತಿ ತಲೆದೋರಿದೆ.

ಒಟ್ಟು 1531 ಹೆಕ್ಟೇರ್‌ ಫಸಲು ಜಲಾವೃತಜಿಲ್ಲೆಯಲ್ಲಿ ಕಳೆದ ಮೂರು ದಿನಗಳ ಮಳೆಯಿಂದಾಗಿ ಕೃಷಿ ಭೂಮಿ 1156 ಹೆಕ್ಟೇರ್‌ ಜಲಾವೃತಗೊಂಡಿದೆ. ಇನ್ನು ತೋಟಗಾರಿಕೆ ಬೆಳೆ 375 ಹೆಕ್ಟೇರ್‌ ಮುಳುಗಡೆಯಾಗಿದ್ದು, ಈ ಪೈಕಿ 12 ಹೆಕ್ಟೇರ್‌ ಬೆಳೆ ಸಂಪೂರ್ಣ ನಾಶವಾಗಿದೆ ಎಂಬ ಮಾಹಿತಿ ಜಿಲ್ಲಾವಿಪತ್ತು ನಿರ್ವಹಣಾ ವಿಭಾಗದ ಅಧಿಕಾರಿಗಳಿಂದ ತಿಳಿದು ಬಂದಿದೆ.

35 ಅಂಗನವಾಡಿಗಳು, 77 ಶಾಲೆಗಳಿಗೆ ಹಾನಿಜಿಲ್ಲೆಯಲ್ಲಿ ಕಳೆದ ಮೂರ್ನಾಲ್ಕು ದಿನಗಳ ಮಳೆಗೆ 35 ಅಂಗನವಾಡಿ ಕೇಂದ್ರಗಳು, 77 ಶಾಲೆಗಳ ಕಟ್ಟಡಗಳಿಗೆ ಭಾಗಶಃ ಹಾನಿಯಾಗಿದೆ. 19ಕ್ಕೂ ಹೆಚ್ಚು ವಿದ್ಯುತ್‌ ಕಂಬಗಳು ಮುರಿದು ಬಿದ್ದಿವೆ.

ಸಾಕಷ್ಟು ಶಾಲಾವರಣಗಳು ತಗ್ಗು ಪ್ರದೇಶದಲ್ಲಿದ್ದೂ ಕಟ್ಟಡದೊಳಗೆ ಪ್ರವೇಶಿಸಲು ಸಾಧ್ಯವಿಲ್ಲದಂತಹ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಅಷ್ಟೇಯಲ್ಲ, ಅಗರ, ಮಾಂಬಳ್ಳಿ ಪೊಲೀಸ್‌ ಠಾಣೆ ಆವರಣ, ಕಟ್ಟಡದೊಳಕ್ಕೂ ಈ ಅವಧಿಯಲ್ಲಿ ಮಳೆ ನೀರು ನುಗ್ಗಿ ಅವಾಂತರವಾಗಿತ್ತು ಎಂಬುದು ಗಮನಾರ್ಹ.

ಇಂಥ ಮಳೆ, ಈ ಬಗೆಯಲ್ಲಿ ನಮ್ಮ ಭೂಮಿ ಜಲಾವೃತಗೊಂಡಿರುವುದನ್ನು ನಾನು ನೋಡಿರಲಿಲ್ಲ. ಇದೊಂದು ಬಗೆಯಲ್ಲಿ ದಾಖಲೆ ಮಳೆಯಾಗಿದೆ. ನಮ್ಮ ಭಾಗದ ಸುವರ್ಣಾವತಿ ನದಿ ಈ ಮಟ್ಟಕ್ಕೆ ಉಕ್ಕಿ ಹರಿಯುತ್ತಿರುವುದನ್ನು ನೋಡಿ ಒಂದೆಡೆ ಖುಷಿಯಾದರೆ, ಮತ್ತೊಂದೆಡೆ ಫಸಲು ಜಲಾವೃತಗೊಂಡಿರುವುದನ್ನು ನೋಡಿದರೆ ಸಂಕಟವಾಗುತ್ತದೆ.

Antony Raju A

Ncibtimesmedia Web Portal Director & national executive officer Contact:9482289151 Gmail: antonyraju166@gmail.com

Related Articles

Leave a Reply

Your email address will not be published. Required fields are marked *

Back to top button