ಚಳಿಯ ವಾತಾವರಣದಲ್ಲಿ ಇದ್ದಕ್ಕಿದ್ದಂತೆ ತಲೆನೋವು, ನೆಗಡಿ, ಗಂಟಲು ನೋವು ಸೇರಿದಂತೆ ಸಣ್ಣಪುಟ್ಟ ಶೀತ ಸಂಬಂಧಿ ಸಮಸ್ಯೆ ಕಾಡುವುದು ಸಾಮಾನ್ಯ.
ಈ ಸಮಯದಲ್ಲಿ ಆರೋಗ್ಯ ಹಾಗೂ ದೇಹವನ್ನು ಸಮತೋಲನದಲ್ಲಿಟ್ಟುಕೊಳ್ಳಬೇಕೆಂದರೆ ಚಹಾ ಅಥವಾ ಕಾಫಿ ಬದಲಿಗೆ ಆರೋಗ್ಯಕರ ಕಷಾಯ ಬಳಕೆ ರೂಢಿಸಿಕೊಂಡರೆ ಉತ್ತಮ.
ಇದರಿಂದ ಜೀರ್ಣಕ್ರಿಯೆ ಸುಗಮಗೊಳ್ಳುವ ಜೊತೆಗೆ ಗ್ಯಾಸ್ಟ್ರಿಕ್‌ ತಡೆಗೆ ಸಹಕಾರಿ.ಆ ಕಷಾಯದ ಪುಡಿಯನ್ನು ಮಾಡಿಟ್ಟುಕೊಂಡರೆ ಬೇಕೆನಿಸಿದಾಗ ಹಾಲಿನೊಂದಿಗೆ ಸೇರಿಸಿ ಕುಡಿಯಬಹುದು.
ಕಷಾಯ ಪುಡಿ ತಯಾರಿಸಲು ಬೇಕಾಗುವ ಪದಾರ್ಥಗಳು: ಕೊತ್ತಂಬರಿ ಬೀಜ – 1 ಕಪ್,ಜೀರಿಗೆ – ಅರ್ಧ ಕಪ್, ಸೋಂಪು – 3 ಟೀಸ್ಪೂನ್, ಮೆಂತ್ಯ – 2 ಟೀಸ್ಪೂನ್, ಕರಿ ಮೆಣಸು – 2 ಟೀಸ್ಪೂನ್, ಲವಂಗ – 10, ಏಲಕ್ಕಿ – 5, ಜಾಯಿಕಾಯಿ – 1, ಅರಿಶಿನ – 2 ಟೀಸ್ಪೂನ್, ಒಣ ಶುಂಠಿ ಪುಡಿ – 2 ಟೀಸ್ಪೂನ್.
ಪುಡಿ ತಯಾರಿಸುವ ವಿಧಾನ: ಪ್ಯಾನ್ ಅನ್ನು ಬಿಸಿ ಮಾಡಿ ಕೊತ್ತಂಬರಿ ಬೀಜ, ಜೀರಿಗೆ ಹಾಗೂ ಸೋಂಪು ಹಾಕಿ ಕಡಿಮೆ ಉರಿಯಲ್ಲಿ ರೋಸ್ಟ್ ಮಾಡಿಕೊಳ್ಳಿ.
ಗರಿಗರಿಯಾಗುವವರೆಗೆ ಹುರಿದುಕೊಂಡು ಬಳಿಕ ಇನ್ನೊಂದು ಪಾತ್ರೆಗೆ ಹಾಕಿ ತಣ್ಣಗಾಗಲು ಬಿಡಿ. ಅದೇ ಪ್ಯಾನ್‌ಗೆ ಮೆಂತ್ಯ, ಕರಿಮೆಣಸು, ಲವಂಗ, ಏಲಕ್ಕಿ ಹಾಗೂ ಜಾಯಿಕಾಯಿ ಹಾಕಿ ಹುರಿದುಕೊಳ್ಳಿ.
ಅರಶಿನ ಮತ್ತು ಒಣ ಶುಂಠಿ ಪುಡಿ ಸೇರಿಸಿ. ಹುರಿದ ಎಲ್ಲಾ ಮಸಾಲೆ ಪದಾರ್ಥಗಳು ತಣ್ಣಗಾದ ಬಳಿಕ ಅವುಗಳನ್ನು ಮಿಕ್ಸರ್ ಜಾರ್‌ಗೆ ಹಾಕಿ ಚೆನ್ನಾಗಿ ಪುಡಿ ಮಾಡಿ ಕಷಾಯ ಪುಡಿ ತಯಾರಾಗಿದ್ದು, ಗಾಳಿಯಾಡದ ಡಬ್ಬಿಯಲ್ಲಿ ಹಾಕಿಡಿ. ಬೇಕೆಂದಾಗ ಬಳಸಬಹುದು.
ಕಷಾಯ ಮಾಡುವುದು ಹೇಗೆ: ಪಾತ್ರೆಯಲ್ಲಿ ಒಂದು ಕಪ್ ನೀರು ಹಾಕಿ, ಬೆಲ್ಲ ಸೇರಿಸಿ ಕುದಿಸಿಕೊಳ್ಳಿ.
ನೀರು ಕುದಿ ಬರಲು ಪ್ರಾರಂಭವಾದಾಗ ಕಷಾಯ ಪುಡಿಯನ್ನು 1-2 ಟೀಸ್ಪೂನ್‌ನಷ್ಟು ಹಾಕಿ ಮಿಶ್ರಣ ಮಾಡಿ ಚೆನ್ನಾಗಿ ಕುದಿಯಲು ಬಿಡಿ. ಬಳಿಕ ಉರಿಯನ್ನು ಆಫ್ ಮಾಡಿ, ಬಿಸಿ ಹಾಲನ್ನು ಕಷಾಯಕ್ಕೆ ಸೇರಿಸಿ ಮಿಶ್ರಣ ಮಾಡಿ. ಕಷಾಯ ತಯಾರಾಗಿದ್ದು, ಬಿಸಿಯಾಗಿರುವಾಗ ಕುಡಿಯಿರಿ.
